阿姐。李老爷阿认得俚？”实夫道：“人是匆认得，来浪花雨楼看见仔几转哉。”诸三姐道：“李老爷，耐勿认得俚，说起来耐也晓得哉。俚末就是倪七姊妹个大阿姐。从前倪有七个人，才是姊妹沟里，为仔要好了，结拜个姊妹，一淘做生意，一淘白相，来里上海也总算有点名气个哉。李老爷，耐阿看见照相店里有‘七姊妹’个照相片子？就是倪（口宛）。”实夫道：“噢，耐就是七姊妹。价末一径倒勿曾说起。”诸三姐道：“阿是说仔七姊妹，李老爷就晓得哉。难故歇个七姊妹，勿比得先起头，嫁个末嫁哉，死个末死哉，单剩倪三家头来浪。郭孝婆是大姐，弄得实概样式。我末挨着第三。再有第二个阿姐，叫黄二姐，算顶好点，该停几个讨人，自家开个堂子，生意倒蛮好。”实夫道：“故歇郭孝婆来里做啥？”诸三姐道：“说起倪大阿姐来，再讨气也无拨。本事末挨着俚顶大，独是运道勿好。前年还寻着一头生意，刚刚做仔两个月，拨新衙门来捉得去，倒说是俚拐逃，吃仔一年多官司，旧年年底坎坎放出来。”

实夫再要问时，忽听得楼下门铃摇响。诸三姐道：“十全转来哉。”即忙下楼去迎。实夫抬头隔着玻璃窗一望，只见诸十全既已进门，后面却还跟着一个年轻俊俏后生，穿着玄色湖绉夹衤，白灰宁绸棉褂。实夫料道是新打的一户野鸡客人，便留心侧耳去听。听得诸三姐迎至楼下客堂里，与那后生唧唧说话，但听不清说的什么。说毕，诸三姐乃往厨下泡茶，送上楼来。

实夫趁此要走，诸三姐拉住低声道：“李老爷（要勿）去囗。耐道是啥人？该个末就是俚家主公呀，一淘同得去烧香转来。我说楼浪有女客来里，俚匆上来，就要去哉。李老爷，耐请坐一歇，对勿祝”实夫失惊道：“俚有实概一个家主公！”诸三姐道：“倒勿是。”实夫想了一想道：“倘忙俚定归要楼浪来末，那价呢？”诸三姐道：“李老爷放心。俚阿敢上来！就上来仔，有我来里，也匆要紧